കറുപ്പാണോ പ്രശ്‌നം മാഡം…………………………?

കറുപ്പാണ് പ്രശ്‌നമെന്ന് ആര്‍ ശ്രീലേഖ ഐപിഎസ്. കറുത്തവരാണ് മോശം. വെളുത്ത സുന്ദരിക്കുപോലും കറുത്തമ്മ എന്നു പേരിട്ടാല്‍ അവര്‍ ദുഷ്ടയായി മാറുമെന്നും ശ്രീലേഖയുടെ കണ്ടുപിടുത്തം. കേരളത്തില്‍ കുറ്റവാളികളായ സ്ത്രീകളുടെ എണ്ണം കൂടുന്നതിനെ കുറിച്ച് ഇന്നൊരു പ്രമുഖപത്രത്തില്‍ എഴുതിയ ലേഖനത്തിലാണ് ശ്രീലേഖയുടെ ഈ നിരീക്ഷണം.
കേരളത്തില്‍ കറുത്തമ്മമാര്‍ വര്‍ദ്ധിച്ചു വരുന്നതായാണ് ശ്രീലേഖ പറയുന്നത്. മുമ്പൊക്കെ ചാരായം വാറ്റിയതിനോ മറ്റെന്തെങ്കിലും ചെറിയ കുറ്റകൃത്യത്തിനോ ആണ് സ്ത്രീകള്‍ പിടിയിലാകാറുള്ളത്. ഇന്നാ അവസ്ഥ മാറി. വലിയ കുറ്റവാളികളായി സ്ത്രീകള്‍ മാറി. കുറ്റവാളികളായ പുരുഷന്മാരെ ആരാധിക്കുകയും അവരുടെ വലംകൈയാവുകയും വിവാഹം കഴിക്കുകയും ചെയ്യുന്ന സ്ത്രീകളുടെ എണ്ണം വര്‍ദ്ധിക്കുന്നു. പ്രത്യേകിച്ച് ചെറുപ്പക്കാര്‍. സോളാര്‍ തട്ടിപ്പില്‍ ഉല്‍പ്പെട്ടിട്ടുള്ള സരിത എസ് നായരെ മനസ്സില്‍ വെച്ചാണ് ഇപ്പോള്‍ ഇതെഴുതിയിരിക്കുന്നതെന്ന് വ്യക്തം. ഈ നിരീക്ഷണത്തിന്റെ കൂടെയാണ് ചെമ്മീന്‍ സിനിമയില്‍ വെളുഉത്ത സുന്ദരിയായ കറുത്തമ്മ ചെയ്ത തെറ്റിനു നേരെ അവര്‍ വിരല്‍ ചൂണ്ടുന്നത്. വെറുതെയല്ല അവര്‍ക്ക് കറുത്തമ്മ എന്ന പേരിട്ടതെന്ന കമന്റും. കൂടെ കേരളത്തില്‍ കറുത്തമ്മമാര്‍ കൂടിവരുകയാണെന്നും.
കേരളപോലീസില്‍ സ്ത്രീസാന്നിധ്യമുറപ്പിക്കുന്നതില്‍ ശ്രീലേഖക്ക് പ്രധാന പങ്കുണ്ട്. പലപ്പോഴും സ്ത്രീപക്ഷത്തുനിന്നുള്ള നിലപാടും അവര്‍ക്കുണ്ട്. അവര്‍ക്ക് ഭയങ്കര ധാര്‍ഷ്ട്യമാണെന്ന് പുരുഷ പോലീസുകാര്‍ പറയുന്നത് ഈ കുറിപ്പെഴുതുന്നയാള്‍ കേട്ടിട്ടുണ്ട്. ആ ധാര്‍ഷ്ട്യം അനിവാര്യമാണ്. പുരുഷപോലീസിനു അതു സഹിക്കാന്‍ കഴിയാത്തത് സ്വാഭാവികം. അതോടൊപ്പം ശ്രീലേഖക്ക് നന്നായി എഴുത്തും വായനയുമെല്ലാം ഉണ്ട്. എന്നിട്ടും ഇത്തരമൊരു കമന്റ് എങ്ങനെ വന്നു എന്നതാണ് അല്‍ഭുതകരം.
കേരളത്തിലും ഇന്ത്യയിലും ലോകത്തെവിടേയും കറുത്തവരല്ല കൂടുതല്‍ കുറ്റവാളികള്‍ എന്നതിനു എത്രയോ കണക്കുകള്‍ ഉണ്ട്. കേരളത്തിലെ കണക്കുകളെങ്കിലും ശ്രീലേഖക്കു പരിശോധിക്കാമല്ലോ. അതിനൊന്നും ശ്രമിക്കാതെ ഇത്തരത്തില്‍ എഴുതിയതെന്തുകൊണ്ട്? സംശയനിവര്‍ത്തിക്കായി വിക്കിപീഡിയയില്‍ ശ്രീലേഖയെ കുറിച്ച് തിരഞ്ഞപ്പോള്‍ കൃത്യമായ മറുപടി ലഭിച്ചു. പ്രൊഫ. എന്‍ വേലായുധന്‍ നായരുടേയും ബി രാധമ്മയുടേയും മകളാണ് ശ്രീലേഖ. നായര്‍ സമുദായത്തില്‍ ജനിച്ച ശ്രീലേഖക്ക് അതേസമുദായത്തിലെ സരിത കുറ്റവാളിയാകുന്നത് സങ്കല്‍പ്പിക്കാനാവുന്നില്ല. കൂടുതല്‍ വിശദീകരണം അനാവശ്യം. ഇങ്ങനെയാണ് കേരളത്തില്‍ ജാതി പ്രവര്‍ത്തിക്കുന്നത്.
ഇനി ശ്രീലേഖ പറഞ്ഞ കാര്യം തന്നെ നോക്കൂ. സമൂഹത്തില്‍ കുറ്റവാളികള്‍ വര്‍ദ്ധിച്ചുവരുന്നു, കുറ്റകൃത്യങ്ങളുടെ സ്വഭാവവും കാലത്തിനനുസരിച്ച് മാറുന്നു എന്നത് യാഥാര്‍ത്ഥ്യം. സ്വാഭാവികമായും അതിനനുസരിച്ച് അവയില്‍ ഉള്‍പ്പെടുന്ന സ്ത്രീകളുടെ എണ്ണവും കൂടും. എന്നാല്‍ മിക്ക സംഭവങ്ങളിലും സ്ത്രീകള്‍ പുരുഷന്മാരുടെ സഹായികളാണ്, സോളാറിലടക്കം.
ഇനി കറുത്തമ്മയിലേക്ക് വരാം. എന്താണ് അവര്‍ ചെയ്ത തെറ്റ്? ഒരാളെ സ്‌നേഹിച്ചതോ? സ്‌നേഹം കുറ്റമാണെന്ന് ഏതു വകുപ്പിലാണ് പറഞ്ഞിരിക്കുന്നത് എന്നു കൂടി മാഡം വിശദീകരിച്ചാല്‍ നന്നായിരുന്നു.
വാല്‍ക്കഷ്ണം.
ഈ കുറിപ്പെഴുതിയതിനു പുറകെ മംഗളം പത്രത്തില്‍ കണ്ട വാര്‍ത്ത. എരവാളര്‍ എന്ന ആദിവാസി വിഭാഗത്തില്‍ പെട്ട അഞ്ചുവയസ്സുകാരനു മിഠായി കൊടുക്കാന്‍ കടയുടമ തയ്യാറായില്ല. പാലക്കാട് മീനാക്ഷിപുരത്താണ് സംഭവം. എരവാളര്‍ക്കു മിഠായിയില്ല എന്നായിരുന്നു കടയുടമ പറഞ്ഞത്. സംഭവം ചോദ്യം ചെയ്ത കുട്ടിയുടെ ബന്ധുക്കളായ മൂന്നു പേര്‍ക്കെതിരെ കേസെടുത്ത് റിമാന്റ് ചെയ്തു…..

ഞങ്ങളുടെ ഫേസ്ബുക് പേജ് ലൈക് ചെയ്യൂ..