ദേശീയജീവിതത്തെ മൂടിയിരിക്കുന്ന കുഴപ്പങ്ങളില്‍ നിന്നും കേരളവും അകലെയല്ല. കൊവിഡാനന്തര സമ്പദ്ഘടനയില്‍ മുഖ്യപങ്കാളിത്തം വഹിക്കുന്നത് മടങ്ങിവരുന്ന പ്രവാസികളോ കാര്‍ഷിക – വ്യാപാര രംഗങ്ങളിലൂടെ തകര്‍ച്ചയെ അഭിമുഖീകരിക്കുന്നവരോ ആയിരിക്കും. ഈ വിഭാഗം കായികാദ്ധ്വാനം വരെ കയ്യടക്കുമ്പോള്‍ പുറന്തള്ളപ്പെടുന്നത് ദളിതരും ആദിവാസികളുമായിരിക്കും. 1957ലെ ഭൂപരിഷ്‌കരണം ഈ ജനവിഭാഗത്തിന് വിധിച്ചത് തുണ്ടുഭൂമിയും കോളനി ജീവിതവുമായിരുന്നെങ്കില്‍ വര്‍ത്തമാനകാലം നല്‍കുന്നത് പട്ടിണിമരണമോ അതിദാരുണമായ ജീവിതാവസ്ഥയോ ആയിരിക്കും. ഇതിനപ്പുറം വഴി തുറക്കാന്‍ ഇടതുപക്ഷത്തിനോ പ്രസക്തി നഷ്ടപ്പെട്ട പ്രതിപക്ഷത്തിനോ കഴിയില്ലെന്നുറപ്പാണ്.